(រាជធានីភ្នំពេញ)៖ នាព្រឹកថ្ងៃទី១៤ ខែតុលា ឆ្នាំ២០២២ ឯកឧត្តម ប៉ាវ ហេងតារា រដ្ឋលេខាធិការក្រសួងពាណិជ្ជកម្ម បានអញ្ជើញជាអធិបតី ក្នុងពិធីបើកវេទិកាពង្រឹងភាពជាដៃគូរវាងស្ថាប័នសាធារណៈ វិស័យឯកជន និងក្រុមកសិករផលិតក្រោមប្រធានបទ “ការអភិវឌ្ឍទីផ្សារខ្សែច្រវាក់តម្លៃបន្លែ” នៅសណ្ឋាគារសាន់វ៉េ។
វេទិកានេះមានការអញ្ជើញចូលរួមពីសំណាក់ លោកជំទាវ គង់ សិទ្ធិកា អគ្គនាយករងនៃអគ្គនាយកដ្ឋានពាណិជ្ជកម្មក្នុងប្រទេស និងជានាយករងគម្រោងជំរុញទីផ្សារសម្រាប់កសិកម្មខ្នាតតូច (AIMS) លោក លឹម ច័ន្ទសុភ័ក្រ្ត នាយករងគម្រោង ទីប្រឹក្សា និងមន្ត្រីអនុវត្តគម្រោង តំណាងមកពីកម្មវិធី ASPIRE តំណាងមកពីគម្រោង SAAMBAT អនុប្រធានការិយាល័យមណ្ឌលភូមិភាគទាំងបី ដៃគូមកពីវិស័យឯកជន និងក្រុមកសិករផលិតបន្លែជាច្រើនរូបទៀត សរុបចំនួន ៦៦នាក់។
ជាកិច្ចចាប់ផ្តើម លោកជំទាវ គង់ សិទ្ធិកា បានលើកពីសាវតារនៃគម្រោង ដែលជាគម្រោងអនុវត្តរួមគ្នារវាងរាជរដ្ឋាភិបាលកម្ពុជា និងមូលនិធិអភិវឌ្ឍន៍កសិកម្មអន្តរជាតិ (IFAD) និងមានក្រសួងពាណិជ្ជកម្មជាភ្នាក់ងារដឹកនាំអនុវត្តគម្រោង។ គម្រោងអនុវត្តទៅលើផលិតផលកសិ-ពាណិជ្ជកម្មសក្តានុពលចំនួនប្រាំ រួមមាន៖ បន្លែ មាន់ស្រែ ស្រូវ ដំឡូងមី និងសូត្រឆៅ នៅក្នុងខេត្តគោលដៅចំនួន១៨ ដែលត្រូវបានបែងចែកជាបីមណ្ឌលភូមិភាគរួមមាន មណ្ឌលភូមិភាគបូព៌ានិងឦសាន្ត មណ្ឌលភូមិភាគនិរតី និងមណ្ឌលភូមិភាគពាយ័ព្យ។ ក្នុងនោះអ្នកទទួលផលចម្បងគឺជាកសិករខ្នាតតូចរួមមានកសិករក្រីក្រ និងស្ថានភាពជិតក្រីក្រមានចំនួន ៧៥ ០០០គ្រួសារ ។ លើសពីនេះ អ្នកទទួលផលបន្ទាប់ គឺជាសហគមន៍កសិកម្ម សហគ្រាសធុនតូច និងមធ្យម កសិ-ពាណិជ្ជកម្ម សហគ្រាសសេវាកម្មព្រមទាំងសមាគមអាជីវកម្ម និងឧស្សាហកម្ម។
លោកជំទាវនាយករងក៏បានបន្ថែមទៀតថា គម្រោងបានខិតខំជំរុញការផ្តល់ហិរញ្ញប្បទាន និងការគាំទ្រដល់ការអភិវឌ្ឍខ្សែច្រវាក់តម្លៃ ដែលជាមធ្យោបាយចាំបាច់និងបន្ទាន់ រួមមានមូលនិធិសម្រាប់ការអភិវឌ្ឍតាមវិស័យ (SDF) មូលនិធិនវានុវត្តន៍ខ្សែច្រវាក់តម្លៃ (VCIF) និងការផ្តល់ហិរញ្ញប្បទាន (LoC) ដើម្បីគាំទ្រកសិករផលិតក្នុងការពង្រីកអាជីវកម្ម ដែលឆ្លើយតបទៅនឹងតម្រូវការទីផ្សា។ នៅក្នុងចំណោមផលិតផលទាំង៥មុខ ផលិតផលបន្លែ គឺជាផលិតផលសក្តានុពលមួយដែលមានកសិករចំនួន ១២ ១២៤ គ្រួសារ នៅក្នុងខេត្តទាំង១៦ ក្នុងចំណោម ១៨ខេត្តរបស់គម្រោងអេមស៍។ ទន្ទឹមនឹងការជួយគាំទ្រពីគម្រោងអេមស៍ ក្រុមកសិករដាំបន្លែនៅតែមានបញ្ហាប្រឈមមួយចំនួនដូចជា ការទិញធាតុចូលដែលមានតម្លៃថ្លៃ កង្វះខាតនៃការទទួលបានព័ត៌មានទីផ្សាររួមមានទំហំផលិតផល គុណភាពផលិតផល ការប្រកួតប្រជែង ការដឹកជញ្ជូនមកកាន់ទីផ្សារ និងកង្វះបច្ចេកទេសក្នុងការដាំបន្លែ។ល។
ជាមួយគ្នានេះដែរក្នុងមតិបើកកម្មវិធីនេះ ឯកឧត្តម ប៉ាវ ហេងតារា រដ្ឋលេខាធិការបានសម្តែងនូវការកោតសរសើរ និងវាយតម្លៃខ្ពស់ចំពោះគម្រោងជំរុញទីផ្សារសម្រាប់កសិកម្មខ្នាតតូច ដែលបានខិតខំប្រឹងប្រែងរៀបចំវេទិកាដ៏មានសារៈសំខាន់នេះឡើង។ ការរៀបចំវេទិកានេះឡើងគឺដើម្បីបង្ហាញ និងចែករំលែកនូវពត៌មាន នានាជុំវិញផលិតកម្មបន្លែ ជាពិសេសសមត្ថភាពនៃការផលិតរបស់ក្រុមកសិករ ការផ្គត់ផ្គង់ទីផ្សារ តម្រូវការទីផ្សារ បញ្ហាប្រឈមនានា និងផែនការអភិវឌ្ឍទីផ្សារបន្លែនាពេលអនាគត។ ក្នុងន័យនេះដែរ ការជួបប្រជុំពិភាក្សាពីគ្រប់តួអង្គពាក់ព័ន្ធ គឺជាយន្តការដ៏មានសារៈសំខាន់ដើម្បីឱ្យគ្រប់ភាគីទាំងអស់បានសិក្សាស្វែងយល់ពីគ្នាទៅវិញទៅមកកាន់តែស៊ីជម្រៅ បានទទួលចំណេះដឹង និងព័ត៌មានទីផ្សារ តម្រូវការផលិតផល និងផ្គត់ផ្គង់ឱ្យកាន់តែទូលាយជាងមុន។
ជាចុងបញ្ចប់ ឯកឧត្តម រដ្ឋលេខាធិការ បានបង្ហាញពីក្តីសង្ឃឹមថាវេទិកានេះអាចជំរុញឱ្យមានការសន្ទនាបែបស្ថាបនា ពិភាក្សាយ៉ាងផុសផុលថែមទៀតលើបញ្ហាដែលគ្រប់ភាគីបានលើកឡើង និងមានសុទិដិ្ឋនិយមថាវេទិកានេះនឹងលើកទឹកចិត្តតួអង្គពាក់ព័ន្ធសហការគ្នាក្នុងការកំណត់ទិសដៅសកម្មភាពជាយុទ្ធសាស្រ្ត ដើម្បីចាប់ផ្តើមជាគ្រឹះដែលនឹងធានាឱ្យមានជោគជ័យលើការអភិវឌ្ឍខ្សែច្រវាក់តម្លៃបន្លែ៕
វ
