(កែប)៖ លោកជំទាវ គង់ សិទ្ធិកា នាយករងគម្រោងជំរុញទីផ្សារសម្រាប់កសិកម្មខ្នាតតូច (AIMS) តំណាងខ្ពង់ខ្ពស់ របស់ឯកឧត្តម សំរិទ្ធ សាកុរា អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេស និងជានាយកគម្រោង AIMS បានអញ្ជើញធ្វើជាអធិបតីភាពក្នុងពិធីបើកកិច្ចប្រជុំបូកសរុបលទ្ធផលការងាររបស់ការិយាល័យមណ្ឌលភូមិភាគនិរតី សម្រាប់ត្រីមាសទី៣ ឆ្នាំ២០២១ និងតម្រង់ទិសការអនុវត្តគម្រោង ក្រោយការវាយតម្លៃពាក់កណ្ដាលគម្រោង AIMS នាថ្ងៃទី០៧ ខែធ្នូ ឆ្នាំ២០២១ នៅមន្ទីរអភិវឌ្ឍន៍ជនបទខេត្តកែប ដែលមានការអញ្ជើញចូលរួមពីសំណាក់លោកប្រធានមន្ទីរពាណិជ្ជកម្មខេត្តតាកែវ និងជាប្រធានការិយាល័យមណ្ឌលភូមិភាគនិរតី លោកប្រធានមន្ទីរពាណិជ្ជកម្មខេត្តកែប កំពត កំពង់ស្ពឺ កណ្ដាល មន្ត្រីអនុវត្តគម្រោងនៃការិយាល័យគ្រប់គ្រងគម្រោង មន្ត្រីនៃមន្ទីរពាណិជ្ជកម្មខេត្តតាកែវ កែប កំពត កំពង់ស្ពឺ កណ្ដាល ទីប្រឹក្សាគម្រោង ទីប្រឹក្សាខ្សែច្រវ៉ាក់តម្លៃនិងវិនិយោគនៃការិយាល័យមណ្ឌលភូមិភាគនិរតី, តំណាង ARDB និងដៃគូបច្ចេកទេសរបស់គម្រោង។
ជាកិច្ចចាប់ផ្ដើម លោក ទេស សុផល ប្រធានមន្ទីរពាណិជ្ជកម្មខេត្តតាកែវ និងជាប្រធានការិយាល័យមណ្ឌលភូមិភាគនិរតី បានបង្ហាញពីសកម្មភាពចម្បងចំនួន ១១ចំណុច ដែលក្រុមការងារនៃមន្ទីរពាណិជ្ជកម្មខេត្តសមាជិក បានអនុវត្ត រួមមាន៖ (១) ការរៀបចំវេទិកាពហុភាគីអ្នកពាក់ព័ន្ធ (២) ការរៀបចំផ្សារចុងសប្ដាហ៍ (៣) ការរៀបចំឱ្យមានទស្សនកិច្ចសិក្សា ក្នុងខេត្ត និងក្រៅខេត្ត (៤) ការរៀបចំករណីសិក្សា (៥) ការរៀបចំសំណើគម្រោង SDF (៦) ការប្រជុំបង្កើត គណៈកម្មការគ្រប់គ្រង និងប្រើប្រាស់លទ្ធផលគម្រោង SDF (៧) ការជួយគាំទ្រដល់ក្រុមផលិតភ្ជាប់អាជីវកម្ម និងរៀបចំកិច្ចសន្យាទិញ លក់ (៨) សហការជាមួយដៃគូបច្ចេកទេស GIC ជំរុញការអនុវត្តសំណើគម្រោង VCIF ឆ្នាំ២០២០ និងការរៀបចំសំណើ VCIF ឆ្នាំ២០២១ (៩) ការរៀបចំសកម្មភាពស្តីពីកិច្ចប្រជុំតភ្ជាប់ទំនាក់ទំនងបណ្តាញ អាជីវកម្មរវាងតួអង្គខ្សែច្រវាក់តម្លៃបន្លែសុវត្ថិភាព (១០)ការរៀបចំសកម្មភាពស្តីពីការសម្របសម្រួល និងកិច្ចសហការរៀន សូត្រ វិធីសាស្រ្តអនុវត្តសកម្មភាពអន្តរគម្រោង រវាងគម្រោង AIMS ជាមួយកម្មវិធី ASPIRE និងគម្រោង SAAMBAT និង (១១) សហការជាមួយដៃគូបច្ចេកទេស កសិដ្ឋានលាស់ថ្មី KLT រៀបចំជ្រើសរើសកសិករសក្ដានុពលសម្រាប់រៀបចំ សំណើគម្រោង VCIF ឆ្នាំ២០២១។
ជាកិច្ចបន្ទាប់ លោជំទាវ គង់ សិទ្ធិកា នាយករងគម្រោង AIMS បានថ្លែងអំណរគុណយ៉ាងជ្រាលជ្រៅចំពោះ ក្រុមការងារទាំងអស់ ដែលបានអញ្ជើញចូលរួមក្នុងកិច្ចប្រជុំនាពេលនេះ។ និងថ្លែងអរគុណក្រុមការងារគម្រោង បានខិតខំ ប្រឹងប្រែងអស់ពីកម្លាំងកាយ និងចិត្ត គួរជាទីមោទនភាពសម្រាប់គម្រោង ទោះបីត្រូវប្រឈមមុខជាច្រើនក្នុងបរិបទ នៃវិបត្តិជំងឺឆ្លងកូវិដ-១៩ក្តី។
លោកជំទាវនាយករងគម្រោង សង្ឃឹមថាក្រុមគ្រួសារកសិករចូលរួមគម្រោងនឹងមានភាពសកម្មបន្តទៀត និងជឿជាក់ ថាក្រុមការងារគម្រោង នឹងបន្តជ្រើសរើសកសិករសក្តានុពល និងក្រុមរឹងមាំឱ្យបានកាន់តែច្រើន ដោយត្រូវត្រួតពិនិត្យថា ក្រុមផលិតខ្សោយត្រូវពង្រឹងសមត្ថភាព តាមរយៈវគ្គបណ្តុះបណ្តាលចំណេះដឹងអាជីវកម្ម និងកសិករណាមិនសកម្មត្រូវជំរុញចូលរួម ក្នុងសកម្មភាពគម្រោងឱ្យបានកាន់តែច្រើន។
លោកជំទាវនាយករងគម្រោង ក៏បានលើកសកម្មភាពចម្បងៗដែលត្រូវអនុវត្ត មានដូចជា ការអនុវត្តតាម Agreed Actions សម្រាប់អនុវត្តនៅឆ្នាំបន្ទាប់ ការកំណត់តំបន់ប៉ូលសេដ្ឋកិច្ចក្រោមក្របខ័ណ្ឌគម្រោង AIMS និងយុទ្ធសាស្រ្ត ដកថយរបស់គម្រោង។
ជាកិច្ចបញ្ចប់ លោកជំទាវនាយករងគម្រោង បានជូនពរក្រុមការងារទាំងអស់ សូមប្រកបដោយសិរីសួស្តី ជ័យមង្គល វិបុលសុខគ្រប់ប្រការ និងស្នើឱ្យកិច្ចប្រជុំទាំងមូលប្រព្រឹត្តទៅប្រកបដោយភាពជោគជ័យ និងទទួលបានលទ្ធផលជាផ្លែផ្កា៕


















