(ភ្នំពេញ)៖ «ខ្ញុំបាទសូមថ្លែងនូវការកោតសរសើរ និងវាយតម្លៃខ្ពស់ចំពោះគម្រោងជំរុញទីផ្សារសម្រាប់កសិកម្មខ្នាតតូច (អេមស៍) ដែលអនុវត្តផ្ទាល់ដោយក្រសួងពាណិជ្ជកម្ម បានខិតខំប្រឹងប្រែងរៀបចំវេទិកាពង្រឹងភាពជាដៃគូរវាងស្ថាប័នសាធារណៈ វិស័យឯកជន និងក្រុមកសិករផលិតក្រោមប្រធានបទ “ការអភិវឌ្ឍទីផ្សារខ្សែច្រវាក់តម្លៃមាន់ស្រែ” ដ៏មានសារៈសំខាន់នេះឡើង។ នេះជាការលើកឡើងរបស់ឯកឧត្តម ប៉ាវ ហេងតារា រដ្ឋលេខាធិការក្រសួងពាណិជ្ជកម្ម ថ្លែងក្នុងពិធីបើកវេទិកាពង្រឹងភាពជាដៃគូរវាងស្ថាប័នសាធារណៈ វិស័យឯកជន និងក្រុមកសិករផលិតក្រោមប្រធានបទ “ការអភិវឌ្ឍទីផ្សារខ្សែច្រវាក់តម្លៃមាន់ស្រែ” នាថ្ងៃទី២២ ខែកក្កដា ឆ្នាំ២០២២ និងមានការអញ្ជើញពីសំណាក់ឯកឧត្តម សំរិទ្ធ សាកុរា អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេស និងជានាយកគម្រោងអេមស៍ លោក ម៉េង ស័ក្តភូសិទ្ធិ មន្ត្រីនៃមូលនិធិអភិវឌ្ឍន៍កសិកម្មអន្តរជាតិ (IFAD) ប្រចាំនៅកម្ពុជា លោក ស៊ាង សុខលីម ប្រធាននាយកដ្ឋានផលិតកម្មសត្វ នៃអគ្គនាយកដ្ឋានសុខភាពសត្វនិងផលិតកម្មសត្វ មន្ត្រីងនុវត្តគម្រោងនៃការិយាល័យគ្រប់គ្រងគម្រោងអេមស៍ តំណាងពីធនាគារ ARDB តំណាងគ្រឹះស្ថានមីក្រូហិរញ្ញវត្ថុ អេអឹមខេ តំណាងពីក្រុមហ៊ុន ជី អាយ ស៊ី តំណាងអ្នកប្រមូលទិញ និងតំណាងក្រុមផលិតមាន់ ជាច្រើននាក់។
ឯកឧត្តម ប៉ាវ ហេងតារា រដ្ឋលេខាធិការក្រសួងពាណិជ្ជកម្ម មានប្រសាសន៍ថា «យោងតាមផែនការយុទ្ធសាស្រ្តអភិវឌ្ឍន៍វិស័យកសិកម្ម២០១៩-២០២៣ រាជរដ្ឋាភិបាលកម្ពុជាបានយកចិត្តទុកដាក់នៅក្នុងការបង្កើនផលិតភាពសត្វ លើកកម្ពស់សុខភាពសត្វ និងពង្រីកទីផ្សារសត្វនៅកម្ពុជា។» ឯកឧត្តមរដ្ឋលេខាធិការក្រសួងពាណិជ្ជកម្ម មានប្រសាសន៍បន្ថែមថា «ផែនការយុទ្ធសាស្រ្តអភិវឌ្ឍន៍វិស័យកសិកម្ម២០១៩-២០២៣ រាជរដ្ឋាភិបាលកម្ពុជា បានដាក់ចេញនូវគោលដៅសកម្មភាពមួយចំនួនមានដូចជា៖ ១) បង្កើនផលិតផលសាច់ឱ្យកើនពី ២៤០ពាន់តោននៅឆ្នាំ២០១៩ ដល់ ២៧០តោននៅឆ្នាំ២០២៣។ ២) បង្កើនអត្រាភាគរយនៃការចិញ្ចឹមសត្វជាលក្ខណៈពាណិជ្ជកម្មឱ្យកើនពី ២៣% នៅឆ្នាំ២០១៩ ដល់ ៣០% នៅឆ្នាំ២០២៣។ និង ៣) កាត់បន្ថយអត្រាជំងឺឆ្លងសត្វឱ្យនៅក្រោម៥% ។
«ដើម្បីរួមចំណែកធ្វើឱ្យផែនការយុទ្ធសាស្រ្តជាតិអនុវត្តប្រកដោយជោគជ័យ ក្រសួងពាណិជ្ជកម្ម តាមរយៈគម្រោងជំរុញទីផ្សារសម្រាប់កសិកម្មខ្នាតតូច (អេមស៍) បានដើរតួនាទីយ៉ាងសំខាន់ក្នុងការសម្របសម្រួលជំរុញ និងភា្ជប់ដៃគូរនានាក្នុងការអភិវឌ្ឍខ្សែច្រវាក់តម្លៃមាន់ស្រែតាមរយៈការភ្ជាប់កសិករខ្នាតតូចទៅកាន់ទីផ្សារក្នុងខេត្ត និងផ្សារធំៗនៅរាជធានីភ្នំពេញ និងដៃគូសំខាន់ៗផ្សេងដូចជាផ្នែកគាំទ្របច្ចេកទេស និងដើមទុនពង្រីកអាជីវកម្ម។ល។» ឯកឧត្តមរដ្ឋលេខាធិការក្រសួងពាណិជ្ជកម្ម គូសបញ្ជាក់។
គូសបញ្ជាក់ថា វេទិកាពង្រឹងភាពជាដៃគូរវាងស្ថាប័នសាធារណៈ វិស័យឯកជន និងក្រុមកសិករផលិតក្រោមប្រធានបទ “ការអភិវឌ្ឍទីផ្សារខ្សែច្រវាក់តម្លៃមាន់ស្រែ” រៀបចំឡើងគឺដើម្បីបង្ហាញ និងចែករំលែកនូវព័ត៌មាននានា ជុំវិញផលិតកម្មមាន់ស្រែ ជាពិសេស សមត្ថភាពនៃការផលិតរបស់ក្រុមកសិករ ការផ្គត់ផ្គង់ទីផ្សារ តម្រូវការទីផ្សារ បញ្ហាប្រឈមនានា និងផែនការអភិវឌ្ឍទីផ្សារមាន់ស្រែនាពេលអនាគត។
